Á hlaupársdag fyrir 40 árum kom Kai Sun í heiminn. Það er svo sem ekki eitt og sér sérstaklega í frásögur færandi því börn fæðast jú alla daga ársins og skiptir þá engu hvort um hlaupársdag sé að ræða eða ekki. En nú er þessi fæðingardagur hennar orðinn ansi sérstakur því að á fimmtudag í síðustu viku, sem var hlaupársdagur, eignaðist hún dóttur.

Kai Sun, sem er prófessor í læknisfræði og gigtarlæknir við Duke Health í Bandaríkjunum, og eiginmaður hennar, Michael Paik, eignuðust þriðja barn sitt klukkan 05.12 að morgni hlaupársdags. Þetta er stúlka sem hefur fengið nafnið Chloe.

Chloe kom í heiminn þremur dögum eftir áætlaðan tíma. Sun ræddi við þáttastjórnendur „Good Morning America“ á fimmtudaginn og sagði að þau hjónin hafi rætt hversu skemmtilegt það yrði ef barnið kæmi í heiminn á hlaupársdag og það hafi gengið eftir.