Líkur eru taldar á nýju kvikuhlaupi við Svartsengi á næstu dögum og áfram eru auknar líkur á eldgosi. Kvikuhlaupi á svæðinu lauk í gær án þess að kvika næði að brjóta sér leið upp á yfirborð jarðar.
Í tilkynningu á vef Veðurstofu Íslands segir að gögn bendi til þess að kvikuhlaupið í gær hafi stöðvast við Hagafell. Líkur á því að eldgos komi upp í tengslum við þetta tiltekna kvikuhlaup hafa minnkað en svæðið verður áfram vaktað með mögulegt eldgos í huga. Ennfremur segir:
„Líkanreikningar sýna að magn kviku sem hljóp frá Svartsengi í gær hafi verið óverulegt miðað við fyrri kvikuhlaup sem enduðu með eldgosi. Því er hægt að líta svo á að kvikusöfnun haldi áfram undir Svartsengi líkt og áður.
Reikna þarf með að annað kvikuhlaup geti átt sér stað næstu daga og áfram eru auknar líkur á eldgosi líkt og fyrir atburðarrás gærdagsins. Hversu langt er í næsta kvikuhlaup veltur á því hversu hratt þrýstingur vegna kvikusöfnunar undir Svartsengi byggst upp til að setja það af stað. Merki um nýtt kvikuhlaup væru líkt og áður áköf smáskjálftahrina á svæðinu.“
Sjá nánar hér.