Edda Sif Pálsdóttir og Hörður Magnússon voru gestir í Íþróttavikunni sem er á dagskrá alla föstudaga á 433.is og í Sjónvarpi Símans.
Dómgæslan í enska boltanum barst meðal annars í tal, sérstaklega eftir frammistöðu dómara í úrslitaleik deildabikarsins á milli Liverpool og Chelsea um síðustu helgi, þar sem fyrrnefnda liðið hafði betur.
„Markið sem Chelsea skorar og var dæmt rangstaða, það var rosalega hæpið. Það var vont sjónarhorn. Ég held að Englendingar kunni ekki ekki knattspyrnureglurnar. Markið sem er tekið af Liverpool, þetta er furðulegasti dómur lengi,“ sagði Hörður í þættinum en mark Liverpool í leiknum var dæmt af á furðulegan hátt vegna rangstöðu.
„Gravenberch var borinn út af og það var ekki einu sinni dæmd aukaspyrna. Enn og aftur eru enskir dómarar að afhjúpa sig sem þeir verstu í álfunni. Ég myndi treysta íslensku dómurunum til að gera betur. Þeir kunna þetta bara ekki. Þeir voru með frábæra dómara áður fyrr en þeir virðast vera algjörlega búnir að missa taktinn.
Og hvernig þeir nota VAR, ég held að ætlun þeirra sé að reyna að taka af öll möguleg mörk. Það er öfugt við það sem innleiðing VAR átti að gera,“ sagði Hörður enn fremur.
Umræðan í heild er í spilaranum.