Fyrir helgi var tilkynnt að Shamima Begum, 24 ára, fengi ekki breskan ríkisborgararétt sinn á nýjan leik en hún var svipt honum 2019 skömmu eftir að hún fannst í flóttamannabúðum í Sýrlandi. Þangað fór hún 2015, þegar hún var 15 ára, og gekk til liðs við hryðjuverkasamtökin sem kenna sig við Íslamska ríkið.

Sky News segir að Begum hafi háð baráttu fyrir breskum dómstólum á síðustu árum til að reyna að endurheimta ríkisborgararéttinn. Nú síðast skaut hún málinu til sérstaks áfrýjunardómstóls. Áfrýjunardómstólinn tilkynnti á föstudaginn að hann féllist á rökin fyrir sviptingu ríkisborgararéttarins og vísaði áfrýjun Begum frá.

Dómarinn sagði að Begum hafi hugsanlega verið undir áhrifum frá öðrum og verið blekkt en það hafi verið hennar eigin ákvörðun að fara til Sýrlands og ganga til liðs við hryðjuverkasamtökin.