Madonna hefur minnst vina og þekktra einstaklinga sem hafa látist úr alnæmi eftir að hafa greinst með HIV. Hafa myndir og nöfn einstaklinga eins og Herb Ritts, Freddie Mercury og Sylvester James birst á meðan Madonna flytur lagið Live to Tell.
Það er aðeins eitt vandamál við þetta og það er sú staðreynd að Vandross greindist aldrei með HIV og hvað þá alnæmi.
Vandross fékk heilablóðfall árið 2003 og lést tveimur árum síðar, 54 ára að aldri.
„Á sama tíma og virðum Madonnu fyrir að heiðra þá sem tapað hafa baráttunni gegn alnæmi bendum við á að Luther greindist ALDREI með alnæmi eða HIV-veiruna. Við vitum ekki hvar Madonna eða starfsfólk hennar fékk upplýsingar um annað,“ segir í tilkynningu sem aðstandendur Vandross sendu frá sér.
Svo virðist sem Madonna og starfslið hennar hafi brugðist skjótt við því nú hefur verið birt yfirlýsing þar sem fram kemur að myndin hafi verið fjarlægð.
Orðrómur var á kreiki á sínum tíma að Vandross hefði greinst með HIV. Birtist frétt þess efnis í bresku blaði árið 1985 og höfðaði hann mál á hendur blaðinu í kjölfarið.
Vildi blaðið meina að gríðarlegt þyngdartap tónlistarmannsins mætti rekja til veikinda eftir HIV-smit en sjálfur sagðist hann einfaldlega hafa tekið mataræði sitt í gegn.
