Dulstirni, sem skín 500.000 milljörðum sinnum sterkara en sólin, er talið vera skærasti hluturinn í alheiminum. Dulstirnið er með svarthol í miðjunni og er massi dulstirnisins 17 milljörðum sinnum meiri en massi sólarinnar okkar.

Þetta kemur fram í fréttatilkynningu frá European Southern Observatory.

Dulstirni eru kjarnar órafjarlægra vetrarbrauta, knúin áfram af glorhungruðum risasvartholum að því er segir á Stjörnufræðivefnum. Fram kemur að risasvartholin gleypi efni með svo miklu offorsi að frá þeim berist mjög mikil birta. Þetta gerir að verkum að dulstirni eru meðal allra björtustu fyrirbæra alheimsins.

Í fréttatilkynningunni kemur fram að dulstirnið stækki svo hratt að það svari til þess að það gleypi eina sól á dag. Hefur það fengið nafnið JO529-4351.

Það tekur ljósið frá því tólf milljarða ára að berast hingað til jarðarinnar. Þar sem ljósið er svo skært var lengi vel talið að þetta væri ekki dulstirni, heldur stjarna í Vetrarbrautinni.

Dulstirnið uppgötvaðist í fyrsta sinn 1980 en var þá talið stjarna. Það var ekki fyrr en á síðasta ári sem það kom í ljós að um dulstirni er að ræða.

Rannsóknin um dulstirnið var gerð af stjörnufræðingum við Australian National University og var hún birt nýlega í vísindaritinu Nature  Astronomy.