Guðni Bergsson óskar Þorvaldi Örlygssyni til hamingju með kjörið sem formaður KSÍ en Guðni hafði barist við Þorvald og Vigni Má Þormóðsson um kjörið.

Guðni sóttist eftir embættinu á nýjan leik en hafði ekki nægan stuðning á ársþingi KSÍ.

„Mig langar til þess að þakka ykkur innilega fyrir öll skilaboðin og hvatninguna frá ykkur undanfarnar vikur. Það hefur verið gaman og hvetjandi að sjá og lesa skilaboðin frá ykkur og finna stuðninginn sem mér þótti mjög vænt um,“ skrifar Guðni á Facebook.

Guðni segist taka góða hluti úr þessu en baráttan var hörð á köflum. „Ekki vann maður kosningu í þetta sinnið en það er alltaf eitthvað gott sem maður getur unnið úr svona reynslu. Kosningabaráttan var hörð á köflum en það má ekki gleyma á þessum tímum hvað fótboltinn gefur okkur mikið og er góður fyrir samfélagið. Verum stolt af fótboltanum okkar!.“

Hann sendir svo kveðju á Þorvald. „ Ég vil óska Þorvaldi Örlygssyni til hamingju með kjörið sem formaður. Hann stóð sig vel í sinni kosningabaráttu og uppskar eins og hann sáði. Áfram Toddi og KSÍ!.“