Kamila Grabska, 36 ára kona á Írlandi, fær engar bætur eftir að hafa lent í bílslysi árið 2017. Grabska hafði farið fram á að fá um 100 milljónir króna vegna áverka sem hún hlaut eftir að bíl var ekið aftan á bifreið hennar.

Kamila hélt því fram að áverkar, meðal annars á hálsi og í baki, hefðu gert það að verkum að hún væri óvinnufær og ófær um að halda á börnunum sínum. Hún hætti í vinnunni eftir slysið og hélt því fram að slysið hefði valdið henni gríðarlegu tekjutjóni til lengri tíma litið.

Ekki var þó allt sem sýndist því eftir að málið kom til kasta dómstóla kom upp úr krafsinu ljósmynd sem sýndi Kamilu í keppni þar sem hún var að kasta jólatré. Myndin var tekin um ári eftir slysið og miðað við hana var Kamila ekki illa þjáð þegar myndin var tekin. Endaði hún meðal annars á að vinna keppnina í kvennaflokki.

Carmel Stewart, dómari í málinu, sá sér ekki annað fært en að vísa málinu frá enda var um að ræða tveggja metra hátt tré. Þótti Stewart augljóst að Kamila væri að ýkja varðandi meiðslin sem hún hlaut.