Myndband af atvikinu hefur vakið talsverða athygli.
Kjóllinn sem konan klæddist virtist sakleysislegur og alls ekki til þess fallinn að særa blygðunarsemi fólks. Það sem vakti hins vegar athygli voru áletranir á kjólnum sem karlarnir töldu að væru úr kóraninum. Töldu mennirnir að konan hefði með þessu gerst sek um guðlast en dauðarefsing getur legið við slíku broti.
Konan er sögð hafa verið úti að versla með eiginmanni sínum í Lahore á sunnudag þegar vegfarendur veittu kjólnum athygli. Múgæsing myndaðist og fyrr en varði höfðu um 300 manns – einna helst reiðir karlar – króað konuna af inni á veitingastað þar sem hún baðst griða.
Lögregla kom að lokum á vettvang og tókst henni að koma konunni í öruggt skjól. Í umfjöllun BBC kemur fram að á kjólnum hafi ekki verið neinar tilvísanir í kóraninn heldur orð sem tákna fegurð.
Á blaðamannafundi sem haldinn var í kjölfarið staðfesti lögregla að ekkert athugavert væri við áletranirnar á kjólnum. Konan baðst engu að síður afsökunar og sagðist ekki ætla að endurtaka þessi mistök – ef mistök skyldi kalla.