Ole Gunnar Solskjær er enn án félags eftir að hafa fengið sparkið hjá Manchester United undir lok 2021.
Solskjær var rekinn eftir 4-1 tap gegn Watford en hann virtist ekki vera að ná til leikmanna liðsins.
Solskjær vissi það sjálfur í hálfleik í þessum leik að hann væri að fara fá sparkið og segir að sumum leikmönnum liðsins hafi verið alveg sama um útkomuna.
,,Við upplifðum marga lágpunkta, ég horfi meira á þá frekar en þegar okkur gekk vel,“ sagði Solskjær.
,,Endirinn átti sér stað gegn Watford, þú kemst ekki lægra en það. Ég vissi í raun hvað myndi gerast strax í hálfleik og ég bað liðið um að gefa allt í sölurnar í síðustu 45 mínúturnar sem við áttum saman.“
,,Sumir af þeim höfðu hætt að hlaupa á vellinum og var í raun alveg sama. Það hljómar illa að tapa 4-1 gegn Watford en það gefur ekki rétta mynd af leiknum.“