Andri Geir Gunnarsson og Vilhjálmur Freyr Hallsson, þáttastjórnendur hlaðvarpsins vinsæla Steve Dagskrá, voru gestir Íþróttavikunnar sem kemur út alla föstudaga. Helgi Fannar Sigurðsson stýrði þættinum.
Það var tilkynnt á dögunum að Thomas Tuchel væri á förum úr stjórastól Bayern Munchen eftir tímabilið. Nú hefst leitin að nýjum stjóra. Xabi Alonso, sem hefur farið á kostum með Bayer Leverkusen, er orðaður við starfið en hann hefur einnig verið orðaður við Liverpool, þar sem Jurgen Klopp hættir í sumar.
„Þetta eykur klárlega líkurnar á að Alonso fari til Bayern,“ sagði Andri.
Vilhjálmur tók undir þetta.
„Ef ég væri að búa til eitthvað „career path“ fyrir Xabi Alonso núna væri það ekki að fara til Liverpool núna. Það væri flott fyrir hann að hafa náð árangri með Leverkusen, fara svo í þetta súkkulaðistarf sem Bayern Munchen er, taka jafnvel bestu mennina úr Leverkusen og koma sem enn stærri prófíll í næsta gigg,“ sagði hann.
„Ég væri samt til í að fá hann í Liverpool og hafa hann í deildinni,“ skaut Andri inn í að lokum.
Umræðan í heild er í spilaranum.