Andri Geir Gunnarsson og Vilhjálmur Freyr Hallsson, þáttastjórnendur hlaðvarpsis vinsæla Steve Dagskrá, voru gestir Íþróttavikunnar sem kemur út alla föstudaga. Helgi Fannar Sigurðsson stýrði þættinum.
Ársþing KSÍ er í dag og verður nýr formaður sambandsins kjörinn. Guðni Bergsson, fyrrum formaður, Þorvaldur Örlygsson og Vignir Már Þormóðsson eru í framboði en svo virðist sem Guðni og Vignir séu sigurstranglegri.
„Ég hef smá áhyggjur af Todda (Þorvaldi). Hann er með minna fylgi en ég hélt. Ég hélt að hann væri alvöru gæi í þetta, hann er góð týpa,“ sagði Vilhjálmur í þættinum.
Hann sló svo á létta strengi og rifjaði upp þegar hann þurfti að glíma við KSÍ í stjórnartíð Guðna.
„Við (Steve Dagskrá) þurftum að skrá okkur sem fjölmiðil, sem kom ekki til af góðu. Ég ákvað að nýta það allavega til að fá fjölmiðlapassa en við fengum þvert nei á það. Þetta var í tíð Guðna og þess vegna væri ég alveg til í að sjá einhvern annan.
Ég myndi treysta Vigni til að skipta um dekk eða ráðleggja mér við barnauppeldi. Ég vil fá einhvern með autt blað þarna inn,“ sagði Vilhjálmur léttur í bragði.
Umræðan í heild er í spilaranum.