Mason Greenwood vill snúa aftur til Manchester United ef félagið er tilbúið að opna dyrnar fyrir honum á nýjan leik.
United treysti sér ekki til að spila Greenwood síðasta haust, félagið hafði ætlað að láta hann snúa aftur en hörð viðbrögð við því fengu félagið til að skipta um skoðun.
Lögregla hafði þá fellt niður rannsókn á máli hans þar sem hann var grunaður um gróft ofbeldi í nánu sambandi, vitni höfðu þá breytt framburði sínum og ný gögn komu fram.
Greenwood var lánaður til Getafe á Spáni þar sem hann hefur spilað vel en Barcelona og Atletico Madrid hafa bæði áhuga á að kaupa hann.
Sir Jim Ratcliffe, nýr eigandi hjá Manchester United hefur hins vegar opnað dyrnar fyrir endurkomu Greenwood og segist ætla að taka málið upp á nýju. Hann ætlar að skoða öll gögn málsins og hvort Greenwood eigi endurkomuleið.
Greenwood er samkvæmt enskum blöðum meira en klár í það og telur hann sig skulda félaginu og stuðningsmönnum að snúa aftur og standa sig, fái hann tækifæri til þess.