Jadon Sancho, leikmaður Manchester United, hundsaði ráð frá vini sínum Emre Can fyrir fjórum árum síðan.

Can var liðsfélagi Sancho hjá Dortmund um tíma en hann er þekktastur fyrir tíma sinn hjá Liverpool á Englandi.

,,Ég sé ekki af hverju einhver ætti að velja Manchester United frekar en Dortmund,“ sagði Can í samtali við Bild árið 2020.

TalkSport rifjar upp þessi ummæli Can en Sancho hefur lítið sýnt í Manchester eftir að hafa komið frá einmitt Dortmund og er í dag á láni hjá sínu fyrrum félagi.

,,Ég myndi alltaf segja honum að halda sig hjá Dortmund, við getum afrekað hluti hér saman.“

,,Jadon er með gæði sem ekki margir leikmenn eru með og ég tók eftir því mjög snemma. Hann er svo mikilvægur fyrir okkur.“

Sancho hefði betur átt að hlusta á félaga sinn á þessum tíma en útlit er fyrir að framtíð hans í Manchester sé lítil sem engin.