Maðurinn sem um ræðir heitir Manfred Galuszka-Grenieczny og er 42 ára. Hann er ákærður fyrir morð á eiginkonu sinni, Dorata, sem var 29 ára þegar hún sást síðast á lífi árið 2016.
Dorata hvarf sporlaust árið 2016 og þrátt fyrir eftirgrennslan lögreglu fannst ekkert sem útskýrt gæti hvarf hennar. Manfred sagði við lögreglu að hún hefði einfaldlega yfirgefið hann og sjö ára son þeirra eftir að hafa kynnst öðrum manni.
Það var svo í ágúst í fyrra að illa farið lík Dorata fannst á heimili Manfreds sem hann hafði nýlega fest kaup á. Var líkið ofan í einhvers konar poka og leikur grunur á að þar hafi það verið allt síðan hún var myrt árið 2016.
Saksóknarar segja að Manfred hafi brjálast þegar hann komst að því að Dorata væri komin með nýjan elskhuga sem búsettur er í Hollandi. Hún hafi sent honum djarfar ljósmyndir og Mandred komist að því.
„Konan spjallaði við þennan nýjan kærasta sinn um klukkan 22 kvöldið áður en hún hvarf. Hún sendi honum myndir af sér á undirfötunum,“ segir Michael Fritsch-Hoermann sem fór fyrir rannsókn málsins hjá lögreglu. „Svo hættu þessar skilaboðasendingar skyndilega,“ segir Michael og bætir við að þessi nýi kærasti hafi reynt, árangurslaust, að ná í Dorata í gegnum síma.