Ólafur Egilsson, leikari, leikstjóri og leikskáld, er á meðal margra sem stunda sundlaugar borgarinnar og eru ósáttir við skertan opnunartíma. Í nýjum pistli á Facebook-síðu sinni fordæmir Ólafur þá ákvörðun borgaryfirvalda að halda til streitu skerðingu almenns opnunartíma úr kl. 22 í 21.

Ólafur bendir á að þetta gerist á sama tíma og þegar verið er að skrá sundmenningu landsins á heimsminjaskrá. Telur Ólafur það skárri kosti að hætta að veita erlendum heldri borgurum gjaldfrjálsan aðgang að sundlaugum eða hækka gjaldskrána, en að halda skerðingu opnunartíma til streitu.

„Mér finnst þetta grátleg skammsýni, léleg stjórnsýsla og bara… heimska, hreint út sagt. Það kostar 3 milljarða að reka sundlaugarnar. Það á að skerða þjónustuna um 7% til að spara 0,6% af rekstrarkostnaði,“ segir Ólafur og bendir á ýmislegt sem mætti frekar spara en að skera þennan klukkutíma aftan af opnunartíma sundlauganna, t.d. ráðgerða styttu af tónlistarkonunni Björk.

Einnig spyr hann vegna rekstrarkostnaður skrifstofu borgarstjórnar hafi hækkað um 30% milli ára. Hann spyr líka hvort það hafi verið nauðsynlegt að halda 2,2 milljóna króna kaffiboð þegar skipt var um borgarstjóra. Einnig bendir hann á að viðburðurinn „Stjórnendadagur borgarinnar“ sem haldinn var fyrir 450 manns í Hörpu hafi kostað 6,6 milljónir króna.

Hann spyr líka hvort nauðsynlegt sé að hafa 23 borgarfulltrúa og 8 varaborgarfulltrúa.

Síðan segir hann:

„Mér finnst ekkert ofantalið mikilvægara en að ég og unglingarnir, mínir og annarra, og bara allir sem vilja geti hangið í kvöldsundi.“