Farþegar um borð í flugi Play frá Alicante til Íslands í fyrra fengu gjafabréf eftir að hafa kvartað undan ölvunarástandi annnarra farþega.

Flugið var um miðjan apríl í fyrra og var þéttsetið af Íslendingum. Samkvæmt heimildum DV voru raunveruleikastjörnurnar Patrekur Jaime, Bassi Maraj, Brynjar Steinn Gylfason, betur þekktur sem Binni Glee, og tvíburarnir Gunnar Skírnir og Sæmundur Brynjólfssynir, um borð og létu mjög illa, fyrir utan Binna Glee sem sat aftast og ekki með hópnum.

Fljótlega eftir að farþegarnir komu um borð, og áður en drykkjarvagninn fór um vélina, sóttu drengirnir meira áfengi að sögn heimildarmanns DV, sem sagði einnig að þeir hafi drukkið mikið, látið illa og verið með mikil læti. Á einhverjum tímapunkti hafi þeir verið farnir að rífast og gráta.

Samkvæmt heimildum DV kvörtuðu nokkrir farþegar, sem vitað er um, í flugfélagið vegna hegðunar Patreks, Bassa, Sæmundar og Gunnars og fengu þeir farþegar strax gjafabréf upp á tugi þúsunda.

Drengirnir voru á leið heim frá Alicante eftir að hafa tekið upp hluta af fimmtu þáttaröð raunveruleikaþáttanna Æði, en fyrsti þáttur fór í loftið á Stöð 2 fyrir viku síðan. Í stiklu fyrir þættina má sjá eitthvað frá ferðalaginu en ekki umræddri flugferð. Tökuliðið var með í fluginu út en ekki heim, þegar ölvunarlætin voru.

Upplýsingafulltrúi Play sagðist ekki geta tjáð sig um mál einstaka farþega. DV reyndi að hafa samband við Æði-drengina án árangurs.

Hætti að drekka eftir að hafa séð þættina

Í viðtali hjá Ísland vaknar á K100 í byrjun febrúar sagðist Patrekur vera hættur að drekka.

„Ég hata smá þessa seríu. Ég er alveg ógeðslega vondur við alla vini mína á einhverjum tímapunkti, ég ætla bara að segja það strax. Ég skammast mín alveg fyrir það. Ég fór á bömmer þegar ég sá þættina og hætti að drekka. Ég hef ekki drukkið nú í þrjá mánuði,“ sagði Patrekur í Ísland vaknar.