Um helgina fannst mannsfótur á lestarteinunum á leið 4 í Bronx í neðanjarðarlestarkerfinu í New York.  Lögreglan reynir nú að finna skýringu á þessu og finna út úr af hverjum fóturinn er.

Líklegt má telja að hann sé af látinni manneskju en það gerir rannsóknina ekki auðveldari. The New York Post skýrir frá þessu auk fleiri miðla.

Samkvæmt fréttum þeirra þá var buxnaskálm utan um fótinn en ekki hefur enn tekist að skera úr um hvort hann er af karli eða konu.

Þetta mál bætist í röð fjölda óhugnanlegra mála sem hafa komið upp í neðanjarðarlestarkerfinu að undanförnu.

Á mánudagskvöldið fannst 57 ára karlmaður látinn í lestarvagni. Lögreglan telur að ofneysla fíkniefna hafi orðið honum að bana.

Á laugardaginn kom til heiftarlegs rifrildis á Queens Plaza lestarstöðinni og var karlmaður sleginn með járnröri.

Í síðustu viku var brasilískur ferðamaður skorinn á háls á þessari sömu stöð.

Ekki er langt síðan skotið var á fjölda fólks á lestarstöð í Bronx og lést einn.

The Guardian segir að glæpatíðnin í New York hafi aukist mjög það sem af er ári miðað við sama tíma á síðasta ári, eða um 22%.

Lögreglan hefur því aukið eftirlit sitt og Eric Adams, borgarstjóri, hefur fyrirskipað 1.000 lögreglumönnum, bæði einkennisklæddum og óeinkennisklæddum, að sinna eftirliti i neðanjarðarlestarkerfinu vegna atburðanna að undanförnu.