Yulia birti í morgun myndband þar sem hún tjáir sig um dauða eiginmanns síns, en hún er ekki í nokkrum vafa um að forsetinn sjálfur hafi átt hlut að máli. Í myndbandinu segist hún ætla að halda áfram því góða starfi sem eiginmaður hennar vann og berjast fyrir frjálsu Rússlandi.
Sjá einnig: Var þetta afhjúpunin sem kostaði Navalny lífið?
Navalnaya segir að rússnesk yfirvöld hafi enn ekki viljað láta lík Alexei af hendi og ástæðan fyrir því sé einföld. Þau séu að bíða eftir því að leifar af Novichok-taugaeitrinu hverfi úr líkama hans. Kveðst Yulia þess fullviss að Alexei hafi látist eftir að honum var byrlað eitrinu.
Hafa aðstandendur hans fengið þau svör að líkið verði ekki látið af hendi fyrr en fullnægjandi krufning hefur farið fram. Ekki hafi tekist að greina dánarorsök við fyrstu krufningu og því sé þörf á annarri til að skera úr um dánarorsök.
„Þegar hann drap Alexei þá drap hann helminginn af mér. En ég hef enn hinn helminginn og ég ætla ekki að gefast upp. Ég mun halda áfram með störf Alexei Navalny og halda áfram að berjast fyrir landið okkar. Ég hvet ykkur til að standa með mér,“ sagði hún og bætti við að það væri engin skömm að gera lítið. „En það er skömm að gera ekkert.“
Stuðningsmenn Alexei segjast vita af hverju honum var ráðinn bani og fljótlega muni upplýsingar um það koma fram. Þá segjast þeir vita nöfnin á þeim sem skipulögðu morðið. Yfirvöld í Rússlandi hafa neitað að hafa átt þátt í dauða Alexei.
