Garðar Stefánsson, forstjóri Rapyd á Íslandi, hefur birt grein á Vísir.is og í Morgunblaðinu þar sem hann sver af fyrirtækinu ýmsar fullyrðingar um stuðning þess við hernað Íraelshers á Gaza. Undanfarið hefur verið í gangi átak hér á landi til að fá fyrirtæki til að segja Rapyd upp sem færsluhirði og færa viðskipti sín til annarra aðila.
Forstjóri móðurfyrirtækisins hefur lýst yfir stuðningi við Ísrael á Twitter:
Frá sjónarhóli Garðars er Rapyd á Íslandi íslenskt fyrirtæki sem byggir á grunni Valitor og Korta sem nú hafa verið sameinuð undir merkjum Rapyd. „Fyrirtækið starfar sem íslenskt hlutafélag og er kennitala félagsins frá 1983. Hjá Rapyd á Íslandi starfa um 180 einstaklingar. Félagið greiðir skatta og skyldur á Íslandi,“ segir Garðar og neitar því að fyrirtækið taki afstöðu til átakanna fyrir botni Miðjarðarhafs:
„Átökin fyrir botni Miðjarðarhafs og mannfall almennra borgara eru hörmungar sem snerta okkur öll. Það á jafnt við um starfsmenn Rapyd sem aðra. Átökin og rót þeirra eru flókin, tilfinningaþrungin og um margt sorgleg. Að þeim ástæðum hefur Rapyd á Íslandi ekki talið rétt að blanda sér í umræðuna fyrr en nú. Ítrekaðar rangar fullyrðingar um Rapyd í fjölmiðlum hefur knúið mig til að svara.
Að gefnu tilefni vil ég árétta að félagið tengist átökunum ekki á nokkurn hátt. Ég get fullyrt að starfsmenn félagsins taka hörmungarnar nærri sér og eins og aðrir og óska þess að átökunum linni. Óska ég þess að fólk sem kennir sig við mannréttindi og talar fyrir mannúð kynni sér staðreyndir um rekstur Rapyd á Íslandi áður en röngum fullyrðingum er haldið fram í fjölmiðlum.“
Verðlaunablaðamaðurinn Freyr Rögnvaldsson gefur lítið fyrir skrif Rapyd-forstjórans. Hann staðhæfir að ekki sé til neitt fyrirtæki sem heiti „Rapyd á Íslandi“, það heiti einfaldlega Rapyd. Freyr bendir á að í fyrirtækjaskrá Ríkisskattstjóra séu raunverulegir eigendur fyrirtækisins skráðir þeir Ariel Shtilman, Maayon Naor og Dennis Francis Allan, eða sömu eigendur og að móðurfyrirtækinu, Rapyd.
„Þessi gaur er svo mikill trúður,“ segir Freyr og sakar Garðar ekki bara um ósannsögli heldur kallar hann lélegan lygara:
„Af hverju að ljúga svona lélega? Það er ekki til neitt Rapyd á Íslandi. Það heitir Rapyd Europe hf. Raunverulegir eigendur eru Ísraelarnir Ariel Shtilman og Mayyan Naor, og Bretinn Dennis Francis Allan. Shtilman lýsti því á dögunum að það ætti að útrýma Hamas með öllum leiðum, og að Rapyd styddi hernað Ísraela.“
