Daily Mail fjallar í dag um miklar raunir sem Dorrit Moussaieff, eiginkona Ólafs Ragnars Grímssonar fyrrverandi forseta Íslands, hefur gengið í gegnum vegna nágranna síns í London. Ítrekað hefur vatn lekið úr íbúð nágrannans yfir í íbúðina hennar Dorrit og valdið miklum skemmdum á dýrum eigum hennar.

Mikið var um dýra skó og dýr sérhönnuð föt í íbúð Dorritar. Íbúðin er í einu dýrasta hverfi borgarinnar en líklega hefur verðmæti hennar minnkað vegna þessara ítrekuðu leka. Auk tískuvarningsins eyðilagðist meðal annars kista sem innihélt margar ljósmyndir sem höfðu mikið tilfinningalegt gildi fyrir Dorrit.

Með umfjöllun Daily Mail fylgja ljósmyndir sem teknar voru í íbúðinni sem sýna meðal annars miklar skemmdir á gólfum og tískufötum.

Dorrit bar sig illa í samtali við Daily Mail. Hún segir að hinir ítrekuðu lekar hafa valdið því að mygla hafi myndast í íbúðinni og hún í kjölfarið veikst. Hún geti ekki lengur dvalið í íbúðinni því næsti leki geti komið á hverri stundu. Það hafi fengið mikið á hana að geta ekki verið í sinni eigin íbúð. Það sé síðan sérstaklega sárt að geta ekki boðið fjölskyldu sinni og Ólafs í heimsókn og enn verra sé að nágranninn hafi ekki sýnt neina tilburði til að bæta ástandið.

Það var einnig sárt fyrir Dorrit að lekarnir hafi eyðilagt verðmætar bækur sem geymdar voru í íbúðinni og föt sem iðulega voru geymd þar sem hún kallar:

„Sérstöku fötin mín í Bretlandi.“

Umræddur nágranni er Ástrali að nafni Greg Coffey en hann er sagður vera stjórnandi hjá vogunarsjóði.

Í umfjöllun Daily Mail er hann kallaður undrabarn (e. whizz-kid) það er þó ekki skilgreint nánar hvað hann hefur gert til að verðskulda þetta viðurnefni.

Dorrit hefur sagt að allt þetta mál hafi valdið henni andlegri áþján og að hún muni leita réttar síns gagnvart Coffey.