Lið Malaga á Spáni var mjög nálægt því að tryggja sér Cristiano Ronaldo frá Sporting Lisbon á sínum tíma.
Þetta átti sér stað þegar Ronaldo var aðeins táningur og spilaði í Portúgal en hann samdi á endanum við Manchester United.
Carlos Rincon sá um kaup Malaga á þessum tíma en liðið skoðaði hann frá 2002 til 2003.
,,Cristiano var eins og hann er í dag nema ungur maður. Hann var með mikinn kraft og með frábæran skotfót,“ sagði Rincon.
,,Á þessum tíma þá höfðum ég og forsetinn mikla trú á kaupunum og það sem ég gerði hafði mikil áhrif á framhaldið.“
,,Hann var ekki búinn að spila fyrstaðalliðsleikinn fyrir Sporting og við gerðum tilboð í gegnum Jorge Mendes (umboðsmann Ronaldo).
,,Við höfðum safnað peningunum fyrir kaupunum en gátum ekki eytt of miklu. Á þessum tíma þá buðum við 1,5 milljónir evra en hann kostaði 3,5 milljónir.“
,,Við gátum ekki klárað kaupin, það var ekki möguleiki að borga þá upphæð. Góðir leikmenn þurfa ekki að kosta mikið en okkur mistókst að fá hann til okkar vegna upphæðarinnar.“