Declyn Lauper, sonur bandarísku poppsöngkonunnar Cyndi Lauper, var handtekinn í New York borg fyrir að vera með hlaðna byssu. Þetta er í annað skiptið sem pilturinn er handtekinn.

Það er miðillinn New York Daily News sem greinir frá þessu.

Declyn er 26 ára gamall og er einkabarn Cyndi, sem gerði garðinn frægan á níunda áratugnum með lögum á borð við „Girls Just Wann Have Fun“ og ballöðunni „True Colors“. Faðir hans er leikarinn David Thornton, sem lék meðal annars í þáttunum Law & Order.

Hann var handtekinn eftir að 24 ára gamall maður var skotinn í Harlem hverfi í New York. Declyn var með hliðartösku og í henni reyndist vera Glock skammbyssa með sjö kúlum í.

Neitar sök

Declyn hefur nú verið sleppt lausum en ákærður fyrir vopnalagabrot og árás. Hann neitar sök í málinu.

Maðurinn sem var skotinn, Omar Lewin, hefur einnig verið ákærður fyrir vopnalagabrot. Hann var fluttur á sjúkrahús en er ekki talinn í lífshættu.

Declyn Lauper er rappari og hefur áður komist í kast við lögin. Sumarið 2022 var hann handtekinn í stolnum Mercedes Benz bíl. Hann var dæmdur fyrir minniháttar brot og skipað af dómara til að „halda sig á beinu línunni.“