Fjögur fyrirtæki voru sérstaklega heiðruð af Nemastofu á fjölmennri hátíð Iðnaðarmannafélagsins á Hótel Natura. Fyrirtækin eru Bílaumboðið Askja, Marel, Snyrtistofa Ágústu og Hasar.
Verðlaunaafhending Nemastofu atvinnulífsins til fyrirmyndafyrirtækja fór fram laugardaginn 3. febrúar síðastliðinn samhliða nýsveinahátið Iðnaðarmannafélagsins í Reykjavík.
Verðlaunin eru veitt fyrirtækjum og iðnmeisturum sem hafa náð góðum árangri í þjálfun og kennslu nema á vinnustað og fyrir framlag þeirra til starfsmenntunar í landinu.
Guðni Th Jóhannesson, forseti Íslands, afhenti hópi sveina viðurkenningar, sem og fyrirtækjunum fjórum verðlaun fyrir móttöku og þjálfun iðnnema á fjölmennri hátíð Iðnaðarmannafélagsins.
,,Við erum gríðarlega stolt af því að vera eitt af fjórum fyrirtækjum sem voru heiðruð af Nemastofu. Hjá okkur starfa í dag um 60 bifvélavirkjar á þremur best búnu bifreiðaverkstæðum landsins, en þrír af hverjum fjórum nemum sem hafa hlotið starfsþjálfun hjá Öskju undanfarin ár starfa hjá okkur í dag,“ segir Berglind Bergþórsdóttir, mannauðsstjóri Öskju, sem tók við verðlaununum fyrir hönd Öskju.