Ferill Ross Barkley virtist vera á leiðinni í hundana eftir fjögurra ára eyðimerkur göngu hjá Chelsea, árin 2018-2022. Eftir ársdvöl hjá franska úrvalsdeildarliðinu Nice í fyrra, þar sem hann var aðallega notaður sem varamaður, samdi hann við Luton fyrir þetta tímabil án þess að það hafi vakið einhverja sérstaka athygli.

Barkley, sem er þrítugur að aldri, fór rólega af stað en hefur vaxið með hverjum leik og er nú farinn að stjórna spili nýliðanna eins og herforingi. Í raun hefur hann umbreytt leik Luton og gert það að verkum að aðdáendur liðsins eru farnir að vera vongóðir um að liðið haldi sér í deild þeirra bestu.

Barkley hefur spilað 15 leiki í úrvalsdeildinni á tímabilinu og þrjá í bikarkeppninni.  Hefur hann skorað hefur í þeim leikjum þrjú mörk og gefið þrjár stoðsendingar.

Hann er þegar kominn í umræðuna sem ein af kaupum tímabilsins, meðal annars hjá álitsgjafanum Paul Merson, og nú eru farnar að heyrast háværar raddir um að hann gæti verið valkostur fyrir Gareth Southgate á miðju enska landsliðsins.

Robb Edwards, þjálfari Luton, var spurður út í þá orðróma eftir stórkostlegt 4-4 jafntefli liðsins gegn Newcastle en hann brást við með varfærnum hætti. „Ég vil ekki búa til einhverjar stórar fyrirsagnir. Gareth er fær í sínu starfi og hann þekkir liðið betur en ég. Eina sem ég veit er að ég elska Ross og hann er að spila frábærlega.“