Nýjar upplýsingar hafa komið fram í tengslum við krufningu á líki manns sem lést eftir hrikalegar og langvarandi misþyrmingar í íbúð í Bátavogi laugardagskvöldið 23. september árið 2023.
Dagbjört Rúnarsdóttir, sem situr í gæsluvarðhaldi í Fangelsinu Hólmsheiði, hefur verið ákærð fyrir morðið. Ákæru hefur nú verið breytt vegna nýrra upplýsinga um dánarorsök mannsins. Í fyrri útgáfu ákærunnar var sagt að maðurinn hefði látist vegna samþættra afleiðinga áverkanna sem Dagbjört veitti honum í heilan sólarhring.
Núna liggur fyrir að maðurinn lést vegna köfnunar. Orðrétt segir um þetta í framhaldsákæru málsins:
„…lést af völdum köfnunar vegna ytri kraftverkunar á hálsinn og efri öndunarveginn en blæðing innvortis og beinmergjarblóðrek vegna beináverka, átti sinn skerf í spillandi áhrifum á súrefnisnæringu til heilans og var þannig til þess fallið að stuðla enn frekar að framvindu köfnunarferlisins.“
Héraðssaksóknari hefur farið fram á að nýtt geðmat, yfirmat, verði gert á Dagbjörtu til að frá frekar úr því skorið hvort hún sé í rauninni sakhæf. Við þingestingu málsins sagði Kolbrún Benediktsdóttir aðstoðarhéraðssaksóknari, að gögn úr farsíma Dagbjartar gæfu tilefni til frekari skoðunar á andlegu ástandi hennar. Í einni upptökunni heyrist hún halda því fram að hinn látni hafi haft undir höndum skotvopnið sem banaði Olof Palme, fyrrverandi forsætisráðherra Svíþjóðar, árið 1986.
Einnig vísaði Kolbrún til framburðar samfanga Dagbjartar á Hólmsheiði, þ.e. lýsingar á framkomu og atferli Dagbjartar þar. Samkvæmt öðrum heimildum DV ríkir mikill ótti á meðal samfanga Dagbjartar við hana.
Dagbjört hefur hafnað nýju geðmati. Samkvæmt upplýsingum frá Arnþrúði Þórarinsdóttur, saksóknara hjá embætti Héraðssaksíknara, er nú beðið úrskurðar um hvort fallist verði á að yfirmat verði gert. Úrskurður um þetta verður kveðinn upp á mánudaginn. Ekki er komin tímasetning á aðalmeðferð í málinu enda liggur ekki fyrir hvort Dagbjört verðuð úrskurðuð sakhæf eða ekki. Málið skýrist að einhverju leyti á mánudag en þá kemur í ljós hvort yfirmat vegna geðrannsóknar verður framkvæmt eða ekki.
