Þetta er niðurstaða nýrrar rannsóknar að sögn The Guardian. Rannsóknin leiddi í ljós að börn, sem búa á svæðum þar sem er 20-25% meira af grænum svæðum, eru með sterkari bein en þau börn sem búa við minna úrval grænna svæða. Svarar munurinn til hálfs árs eðlilegs vaxtar.
Rannsóknin, sem er sú fyrsta þessarar tegundar, leiddi einnig í ljós að 65% minni líkur eru á að þau börn, sem búa nærri grænum svæðum, glími við mjög litla beinþéttni.
Styrkur beinanna vex á æskuárunum og fullorðinsárunum en nær hámarki um fimmtugt og fer síðan dvínandi eftir það.
Með því að stækka græn svæði og bæta aðgengi barna að þeim er því hægt að koma í veg fyrir beinbrot og beinþynningu þegar fólk verður gamalt. Engin munur var á kynjunum varðandi áhrif þess að búa nærri grænum svæðum.
Tengsl grænna svæða og sterkari beina er líklega afleiðing þess að börn, sem búa nærri grænum svæðum, hreyfa sig meira því þau hafa góða aðstöðu til þess. Þetta örvar beinvöxtinn.
Bestu áhrifin eru ef grænu svæðin eru með trjám og telja vísindamenn hugsanlega skýringu á því vera að þau séu þá eftirsóknarverðari til að heimsækja.
Vísindamennirnir rannsökuðu einnig hvort skjátími, vítamínneysla og neysla mjólkurafurða hefði áhrif en þau reyndust ekki mikil.
