Stjörnufræðingar sáu dularfullan hlut í um 40.000 ljósára fjarlægð frá jörðinni. Hann er í þéttri stjörnuþyrpingu sem nefnist NGC 1815. Hluturinn sást í hröðum glömpum frá ferðafélaga hans, nifteindastjörnu sem snýst um sjálfa sig og sendir frá sér ljósgeisla á 6 millisekúndna fresti.
Live Science segir að samkvæmt því sem vísindamenn segja þá sé þessi hlutur á milli þess að vera svarthol eða nifteindastjarna. Það þýðir að hann getur alveg eins verið hvorugt þessara fyrirbæra.
Rannsóknin hefur verið birt í vísindaritinu Science.
Ben Stappers, aðalhöfundur rannsóknarinnar, sagði í tilkynningu að hvort sem um svarthol eða nifteindastjörnu sé að ræða, þá séu það spennandi möguleikar. Nifteindastjörnu-svartholskerfi sé mikilvægt þegar kemur að því að sannreyna kenningar um þyngdaraflið og þung nifteindastjarna geti veitt nýja innsýn í kjarneðlisfræði.
Bæði svarthol og nifteindastjörnur eru leifar sem verða til þegar gríðarlega stórar stjörnur enda líf sitt í öflugri sprengingu, verða að sprengistjörnu.
Þrátt fyrir að svarthol og nifteindastjörnur verði til á sama hátt, þá getur massi þeirra verið mjög mismunandi. Ofurmassamikil svarthol geta vegið eins mikið og milljarðar sóla en nifteindastjörnur verða sjaldan þyngri en sem svarar til þriggja sóla. En léttustu svartholin og þyngstu nifteindastjörnurnar geta litið eins út úr mikilli fjarlægð.
