HS Veitur tilkynntu á Facebook-síðu sinni fyrr í kvöld að varavatnsból fyrir Reykjanesbæ og Suðurnesjabæ, sem ráðist var í að koma á laggirnar vegna mögulegra áhrifa jarðhræringa á Reykjanesskaga á vatnsból við Svartsengi, sé tilbúið til notkunar.

Í færslunni segir að HS Veitur hafi unnið að því í samvinnu við bæjarstjóra Reykjanesbæjar og Suðurnesjabæjar og stjórnvöld að gera ráðstafanir til þess að koma upp varavatnsbóli við Árnarétt í Garði sem nýst geti þeim 25 þúsund íbúum bæjarfélaganna sem og fyrirtækjum sem þar eru.

Varavatnsbólið sé tilbúið og muni nýtast ef á þarf að halda, enda sé líkur taldar á endurteknum eldgosum á Reykjanesi á næstu árum eða áratugum, með tilheyrandi hættu á áhrifum á neysluvatnsafhendingu fyrir umrætt svæði.

Af þessu tilefni komu saman við vatnsbólið Kjartan Már Kjartansson bæjarstjóri Reykjanesbæjar, Magnús Stefánsson bæjarstjóri Suðurnesjabæjar, Jóhann Friðrik Friðriksson stjórnarformaður HS Veitna og Páll Erland forstjóri fyrirtækisins. Gæddu þeir sé á vatni úr nýja vatnsbólinu.

Á heimasíðu HS Veitna kemur fram að fyrirtækið hafi mætt góðum skilningi frá stjórnsýslunni um flýtimeðferð á tilskyldum leyfum til að hefja borun og uppsetningu varavatnsbólsins. Framkvæmdir hafi byrjað 20. nóvember síðastliðinn og hafi fjölmargir verktakar unnið stanslaust að verkinu síðan þá. Áætlaður kostnaður nemi 14o milljónum króna.

Þar kemur einnig fram að varavatnsbólið við Árnarétt sé eldra vatnsból sem hafi nú verið stækkað. Fyrir hafi verið ein borhola en nú hafi tveimur verið bætt við, dælur settar upp og þær tengdar.

Vatnsbólið geti annað neysluvatnsþörf íbúa og fyrirtækja á svæðinu, en þó ekki hjá stórnotendum.

Gert sé ráð fyrir að varavatnsbólið geti skilað allt að 100 lítrum á sekúndu. Fólk og fyrirtæki í Reykjanesbæ og Suðurnesjabæ noti að jafnaði um 170 lítra á sekúndu. Þar af fari yfir 70 lítrar til stórnotenda, svo sem til sundlauga og fyrirtækja í iðnaði.

Árnarétt sé hentug staðsetning því þar sé greitt aðgengi inn á neysluvatnsdreifikerfi HS Veitna í Reykjanesbæ og Suðurnesjabæ auk þess sem þar sé skilgreint vatnsverndarsvæði.