Fjöldi sérmenntaðs fólks, eins og t.d. hjúkrunarfræðinga og kennara, sem er heimilislaust hefur margfaldast í Bretlandi síðan 2020. Þrátt fyrir að starfa við sitt fag ræður fólkið ekki við húsnæðiskostnað sem fer síhækkandi.

Þetta kemur fram í umfjöllun Mirror.

Samkvæmt opinberum tölum eru 18.530 einstaklingar sem eru í starfi heimilislausir. Þeim hefur fjölgað um 40 prósent síðan 2020. Þar á meðal er fólk í störfum sem krefjast sérstakrar menntunar eins og hjúkrunarfræðingar og kennarar.

Mirror ræddi við grunnskólakennara sem er heimilislaus.

Hann er fráskilinn faðir en í kjölfar skilnaðarins var hann svo skuldugur að það var honum óviðráðanlegt og hann hefur sofið í bílnum sínum síðustu 3 mánuði. Hann segist hafa tekið lán til að greiða húsaleigu svo hann gæti fengið börnin sín í heimsókn og hafa fullnýtt heimildir á greiðslukortum sínum til að fjármagna framfærslukostnað. Staðan hafi verið orðin svo slæm að hann hafi sleppt máltíðum til að geta keypt mat handa börnunum. Staða hans hafi verið algjörlega ósjálfbær og þess vegna hafi hann ákveðið að búa í bílnum til að skera niður framfærslukostnaðinn.

Það kemur ekki fram í hvaða borg Bretlands kennarinn býr í bílnum sínum. Hann segist leggja bílnum á ókeypis bílastæðum en fólk sé stöðugt að labba framhjá honum á nóttunni sem fylli hann ótta. Hann segist fara í sturtu á hverjum morgni í líkamsræktarstöð áður en hann mætir til vinnu. Þetta líferni takið mikið á andlega heilsu sína og hann þurfi að hafa sig allan við til að einfaldlega brotna ekki niður.

Í Emglandi einu eru um 309.000 manns heimilislaus og þar af eru 140.000 börn og hefur þeim fjölgað um 14 prósent síðan 2022. Helmingur fjölskyldna sem komið hefur verið fyrir í húsnæði sem átti aðeins að vera til bráðabirgða hefur búið þar í meira en tvö ár.

Forsvarsmaður góðgerðarsamtaka segir að fólk sem er í vinnu en samt heimilislaust eigi afar erfitt með að láta daglegt líf ganga upp. Hann segir síhækkandi framfærslukostnað og skort á húsnæði á viðráðanlegu verði helstu skýringarnar á þessari stöðu. Fólki sem glími við fátækt muni fjölga grípi stjórnvöld ekki til aðgerða eins og t.d. að byggja félagslegt húsnæði í auknum mæli.