Maður að nafni Elliot Binney frá Oklahoma var handtekinn í síðustu viku fyrir að skilja fjölskyldu sína eftir á vettvangi bílslyss. Sextán ára dóttir hans lést í slysinu.
Huffington Post greinir frá þessu.
Bíll fjölskyldunnar valt í borginni Bixby, nálægt Tulsa í austurhluta fylkisins, þann 11. janúar. Shelby Binney, hin sextán ára dóttir Elliot, þeyttist út úr bílnum en hún var ekki í bílbelti þegar slysið varð. Shelby var úrskurðuð látin við komuna á spítala.
Eiginkona Elliot og tvö önnur börn þeirra á grunnskólaaldri voru einnig í bílnum þegar hann valt. Þau voru flutt á spítala til aðhlynningar. Hinn 41 árs gamli Elliot, sem var að keyra bílinn, stakk hins vegar af eftir slysið.
Rannsókn lögreglunnar leiddi í ljós að Elliot hafi keyrt allt of hratt. Hann reyndi að taka fram úr öðrum bíl á svæði þar sem framúrakstur var ekki leyfður og missti stjórn á bílnum. Vodkaflaska fannst á vettvangi slyssins.
Elliot hljóp frá vettvangi slyssins og hirti ekki um fjölskyldu sína. Hann fór beint að húsi fyrirtækisins sem hann rekur, tók þar annan bíl og keyrði út úr bænum. Lögregla hafði upp á honum í bænum Checotah, um 80 kílómetrum sunnar en Bixby, og handtók hann.
Handtakan sást á búkmyndavélum lögreglumanna. Elliot var á gráum pallbíl þegar hann var stöðvaður og skipað að yfirgefa bílinn.
Búist er við því að Elliot verði ákærður fyrir manndráp af gáleysi. Einkum vegna þess að hann aðgætti ekki með dóttur sína sem þeyttist út úr bílnum en einnig vegna glæfralegs aksturslags og ölvunar.
Að sögn lögreglu hefur Elliot viðurkennt að hafa tekið sopa úr vodkaflöskunni. Eiginkona hans sagði að hjónin hefðu verið að rífast í bílnum rétt fyrir slysið.
Þetta er ekki í fyrsta skiptið sem Elliot Binney kemst í kast við lögin vegna aksturs. Í þrígang hefur hann verið ákærður fyrir að hafa keyrt af vettvangi áreksturs en hefur þó aldrei verið dæmdur. Einnig hefur hann verið ákærður fyrir ölvunarakstur.
Shelby Binney var nemandi og klappstýra sem er lýst sem jákvæðri og duglegri stúlku.
„Hún var með hjarta úr gulli og sýndi öllum væntumþykju. Shelby var alltaf brosandi. Hún elskaði liðsfélaga sína, þjálfarana og æfingarnar. Við söknum hennar afar djúpt,“ segir í yfirlýsingu klappstýruliðsins hennar.
Á þessari stundu er ekki vitað hversu alvarleg meiðsli aðrir fjölskyldumeðlimir hlutu í slysinu. Ekki er heldur vitað hvort þeir hafi verið útskrifaðir af sjúkrahúsi.
Elliot hefur verið sleppt úr varðhaldi eftir að hafa greitt tryggingu.
