Dagbjört Rúnarsdóttir, sem ákærð er fyrir að hafa pyntað sambýlismann sinn til dauða, í íbúð að Bátavogi þann 23. september 2023, neitar sök í málinu og hafnar bótakröfum tveggja aðstandenda hins látna.
Dagbjört, sem er í gæsluvarðhaldi á Hólmsheiði, tók afstöðu til ákærunnar í gegnum fjarfundabúnað, við þingfestingu málsins, sem var við Héraðsdóm Reykjavíkur í dag Dagbjört sat nokkuð yfirveguð á stól í fangelsinu og fylgdist með fyrirtökunni.
Er dómari spurði hana hver afstaða hennar væri til ákærunnar og miskabótakrafna aðstandenda hins látna, sagði hún:
„Ég bara hafna þessu. Neita sök.“
Til umfjöllunar kom krafa héraðssaksóknara um að dómurinn kallaði til matsmann til að gera annað geðmat á hinni ákærðu. DV hefur ekki upplýsingar um niðurstöðu þess geðmats sem liggur fyrir en þó má draga þá ályktun af framgangi málsins að Dagbjört sé þar álitin sakhæf.
Arnar Kormákur Friðriksson, verjandi Dagbjartar, hafnar fyrir hennar hönd öðru geðmati. Krefst Dagbjört úrskurðar á aðkomu dómkvaddra matsmanna. Segir hann að Dagbjört kæri sig ekki um annað geðmat.
Kolbrún Benediktssdóttir, aðstoðarhéraðssaksóknari, segir gögn úr farsíma meðal annars gefa tilefni til frekari skoðunar á andlegu ástandi Dagbjartar. Í einni upptökunni heyrist hún halda því fram að hinn látni hafi haft undir höndum skotvopnið sem banaði Olof Palme, fyrrverandi forsætisráðherra Svíþjóðar, árið 1986.
Einnig vísaði Kolbrún til framburðar samfanga Dagbjartar á Hólmsheiði, þ.e. lýsingar á framkomu og atferli Dagbjartar þar. Samkvæmt öðrum heimildum DV ríkir mikill ótti á meðal samfanga Dagbjartar við hana.
Fyrirtaka í málinu verður þann 29. janúar. Dagsetning á aðalmeðferð, hinum eiginlegu réttarhöldum, liggur ekki fyrir.
