Einnig er hægt að hlusta á Spotify eða hlaðvarpsþjónustu Google.

Í dag starfar Ragga við kennslu og sem forstöðumaður félagsmiðstöðvar auk þess að snúa skífum um helgar. Ragga hefur gengið í gegnum margar þolraunir í lífinu en í hennar huga er það ekki eitthvað sem heldur aftur af henni heldur eitthvað sem hún nýtir sér til góðs.

Hún varð fyrir hrottalegri líkamsárás í byrjun árs 2015 og segir umrætt atvik hafa verið eins konar vendipunkt í hennar lífi. Hún ákvað að fara í áfengismeðferð og snúa blaðinu við.

„Þetta var bara dæmi um það að vera á röngum tíma, á röngum stað, í vitlausu húsi,“ segir Ragga í Fókus.

„Eins og svo oft, þá var ég að hugsa um hagsmuni annarra þegar ég varð fyrir þessari líkamsárás og taldi mig á þeim tíma hafa komið mér í þessar aðstæður, þetta hefði ekki þurft að gerast.“

Ragga segir að hún hafi talið sig vera að hjálpa konu sem hún þekkti úr skelfilegum aðstæðum, þáverandi kærasti konunnar brást illa við og réðst á Röggu og sparkaði í hana á meðan hún lá. Ragga vill ekki fara út í of mikil smáatriði en segir að ástæðan fyrir því að þetta atvik hafi verið vendipunktur þegar kom að því að fara í meðferð, var að þetta umrædda kvöld hafi hún verið nýkomin af djamminu og drukkin.

„Í grófum dráttum þá heyrði ég átök inni á heimili sem ég var nýfarin út af, heyrði átök, sneri við og hugsaði: „Ég get ekki skilið hana eftir.“ Ég braut rúðu, hann kom fram, brjálaðist og réðst á mig,“ segir hún.

Ragga segir að þegar hún vaknaði daginn eftir hafi hún lofað sjálfri sér að lenda aldrei aftur í svona aðstæðum þar sem hún gæti ekki varið sig.

Of hrædd til að bera vitni

„Það sem er svo ógeðslega erfitt með þetta mál er að það var fellt niður tvisvar sinnum. Það ristir svo djúpt gremjan gagnvart því að þetta hafi ekki verið klárað í réttarkerfinu. Hún [kærasta árásarmannsins] var svo hrædd að hún þorði ekki að bera vitni gegn honum,“ segir Ragga.

„Ég fékk hjálp, fór í rosa góða áfallameðferð. Næstum því of seint, ég gerði það hálfu ári eftir árásina, en ég ætlaði fyrst að gera þetta ein. En svo fann ég að ég var ekki að höndla það, til dæmis að mæta honum úti á götu. Ég var hrædd. En mér er svo nákvæmlega sama í dag, því ég veit hver ég er og hvurslags manneskja hann er.“

Ragga segir nánar frá þessu í spilaranum hér að ofan. Brotið er hluti af nýjasta þætti af Fókus sem má horfa á í heild sinni hér. Einnig er hægt að hlusta á Spotify og Apple Podcasts.