Í síðustu viku komu til Íslands tveir ungir drengir frá Malawi sem munu æfa með Aftureldingu a.m.k. næstu þrjá mánuðina. Levison Mnyenyembe og Precious Kapunda eru báðir 18 ára gamlir en þeir hafa verið í Ascent knattspyrnuskólanum í Malawi.

Lið frá Ascent vann keppni í 3. flokki á Rey Cup á Íslandi í júlí síðastliðnum. Levi og Precious komu einnig með hópnum á Rey Cup en þar sem þeir voru of gamlir til að spila á mótinu þá fengu þeir að æfa með Aftureldingu í eina viku á sama tíma.

Drengirnir höfðu eftir það mikinn áhuga á að koma aftur til Íslands til að æfa við betri aðstæður en í heimalandinu. Með hjálp frá styrktaraðilum og góðgerðarsamtökum hefur tekist að fjármagna dvöl þeirra hér á landi fram í apríl. Á þeim tíma munu Levi og Precious æfa með bæði meistaraflokki og 2. flokki Aftureldingar. Vonir standa til að þeir geti dvalið á lengur á Íslandi, en aðstandendur drengjanna og Afturelding eru að leita leiða til að fjármagna dvöl þeirra út þetta keppnistímabil.

Afturelding tekur vel á móti þeim í Mosfellsbæ og gaman verður að fylgjast með þeim á æfingum og í leikjum næstu mánuðina.