„Ég er hvergi af baki dottinn með útópískar pælingar til að hugsa í lausnum fyrir Grindavíkurbæ,“

segir Aríel Pétursson formaður Sjómannadagsráðs.

„Geldinganesið og uppbygging þess var gjarnan þrætuepli stjórnmálamanna á mínum uppvaxtarárum, nú rétt eins og sagan endalausa af Sundabrautarkarpi. Fyrst og fremst var öll skipulagsvinna nessins sett til hliðar eftir hugmyndasamkeppni arið 1990 á þeim forsendum að offramboð væri á lóðum i Reykjavík og ekki talið svara kostnaði að ráðast í uppbyggingu. Nú er öldin önnur og kreppir víða skóinn að í lóðamálum,“ segir Aríel.

Bendir hann á að Geldinganesið er fyrsta flokks byggingarland með fjallasýn og í algjörri nálægð við hafið og höfuðskepnurnar. „Þar er nokkuð aðdjúpt og voru meira að segja pælingar um hafnargerð á sínum tíma. Grindavík telur hérumbil 250 hektara á meðan Geldinganesið eru 220 – munurinn er því smávægilegur.“

Aríel segist hafa farið í smá servíettureikning í dag [gær]:

„1200 íbúðir.

Meðalstærð íbúða 110 fm.

Byggingarkostnaður pr fm 600 þús (ekki greitt fyrir byggingarrétt en þó gatnagerðargjöld og önnur almenn gjöld).

Samtals framkvæmdakostnaður upp á 79,2 milljarða.

Heildarbrunabótamat íbúða í Grindavík eru 78,5 milljarðar, svona til hliðsjónar.“

Lausnin kallar á Sundabraut

Segist hann þó fullfrakkur að ætla Reykjavíkurborg að afhenda Geldinganesið endurgjaldslaust og jafnframt að koma með lausn sem kallar óhjákvæmilega á Sundabraut sem ætla má að kosti annað eins og allar íbúðirnar sem hann nefnir. 

„En okkar þrautseiga og eljusama þjóð kom sér möglunarlaust í gegnum covid-tímabilið með öðrum eins stuðningi og vel rúmlega það, enda erum við samfélag og stöndum með okkar samlöndum í gegnum súrt og sætt.

Þetta er sett fram með samkennd í huga og djúpri lotningu fyrir bræðrum okkar og systrum í Grindavík sem að sjálfsögðu stýra för í öllu því sem koma skal. Við stöndum öll saman.“

Grindvíkingurinn Siggeir F. Ævarsson segir í athugasemd: „Það sem að þessi hugmynd hefur líka fram yfir að koma meirihluta Grindvíkinga fyrir í Þorlákshöfn eða Keflavík, er að þegar Grindavík verður loks byggileg á ný, þá eru þarna íbúðir í hundraðatali á höfuðborgarsvæðinu, þar sem vöntunin er mest. Að kaupa Grindvíkinga út leysir nefnilega bara hálfan vandann á þessum tímapunkti.“

Alls bárust 30 tillögur í hugmyndasamkeppni um Geldinganes árið 1990, þrjár þeirra voru verðlaunaðar. Ákveðið var að kaupa fjórar aðrar og fimm tillögur að auki fengu viðurkenningu sem athyglisverðar tillögur. Fjallað var um hugmyndasamkeppnina í Morgunblaðinu meðal annars.