Stríð framtíðarinnar er svolítið sem sérstök deild hjá NATO vinnur alla daga við að undirbúa og eitt er það sem er gríðarlega mikilvægt að hafa í huga í tengslum við stríð framtíðarinnar. Það er hættan á að verða „blindur“.
Þetta sagði þýski hershöfðinginn Chris Badia, sem er yfirmaður Allied Command Transformation (ACT) sem er sú deild NATO sem vinnur með hugsanlegar sviðsmyndir stríða í framtíðinni, í samtali við VG.
Hlutverk ACT er að tryggja að NATO sé undir stríð framtíðarinnar búið og raunar alltaf einu skrefi á undan. Þetta á bæði við um næstu kynslóð orustuþota, næstu kynslóð kafbáta og næstu kynslóð hernaðartækni.
Badia sagði að eitt atriði standi upp úr sem það stærsta. „Stærsta áskorunin er að óvinurinn mun alltaf reyna að gera þig blindan. Að þú getir ekki lengur séð, talað eða heyrt. Ef óvinurinn gerir þig blindan, þá tapar þú. Það má ekki gerast. Þess vegna er það allra mikilvægasta að vernda gervihnettina í geimnum. Öll fjarskipti og leiðsaga eiga sér stað þar,“ sagði hann.
Önnur áskorun er dreifing rangra upplýsinga. „Hvað er satt, hvað er rétt, hvað er rangt? Þess vegna er eitt af forgangsverkefnunum að tryggja að fjarskiptaleiðirnar haldist opnar,“ sagði hann.
Þegar hann var spurður hvort óvinurinn verði sífellt snjallari og einu skrefi á undan, sagði hann:
„Ég myndi ekki segja að þeir séu skrefi á undan. Við neyðumst til að vera alltaf skrefi á undan. En óvinir okkar eru samviskulausir, leiðtogalausir og skortir siðferði. Það gerir þetta að stærri áskorun. En netheimurinn og geimurinn eru annað vandamál því þar eru engir skýrir samningar eða reglur,“ sagði hann og vísaði þar meðal annars til gervihnatta.
