Eiríkur Rögnvaldsson, prófessor emeritus í íslensku við Háskóla Íslands gagnrýnir, á Facebook-síðu sinni Rauða krossinn á Íslandi fyrir að taka við greiðslum vegna neyðarsöfnunar fyrir Grindvíkinga í gegnum ísraelska fyrirtækið Rapyd.
Eiríkur segist hafa sent Rauða krossinum tölvupóst um málið:
„Ég ætlaði að fara að styrkja Grindavíkursöfnun Rauða krossins gegnum form á heimasíðunni en hnykkti við þegar ég kom á greiðslusíðuna og sá að slóðin þar byrjaði á https://checkout.rapyd.net/. Það kemur auðvitað ekki til greina að styrkja Rapyd þannig að ég hætti snarlega við og millifærði beint á Rauða krossinn í staðinn. Ég er mjög hissa á ykkur að nota greiðsluþjónustu Rapyd og skora á ykkur að hætta því eins fljótt og auðið er.“
Silja Bára Ómarsdóttir formaður Rauða krossins svarar Eiríki í athugasemdum og segir að unnið sé að því að skipta um færsluhirði en að önnur slík fyrirtæki séu að „drukkna.“
Eiríkur svarar með því að hvetja til þess að í millitíðinni veki Rauði krossinn sérstaka athygli á öðrum leiðum sem færar séu til að styrkja söfnunina. Silja svarar þá öðru sinni og bendir á að hægt sé að hringja í söfnunarnúmer, millifæra í gegnum heimabanka og að millifæra í gegnum appið Aur.
Eins og DV greindi frá í gær hefur borið á vantrausti í garð Rauða krossins vegna söfnunarinnar meðal annars vegna þess að félagið rak áður talsmannaþjónustu fyrir hælisleitendur og sá félagið ástæðu til að setja sérstaka færslu á Facebook-síðu sína vegna þessa.
Í þeirri færslu segir að allt söfnunarféð fyrir utan tæp tvö prósent sem renni til kynningarmála vegna söfnunarinnar renni til Grindvíkinga í neyð og sé ætlað að hjálpa þeim með tilfallandi kostnað en þó ekki tjón á húsum eða munum. Þegar félagið efndi til söfnunar fyrir Grindvíkinga þegar bærinn var fyrst rýmdur í nóvember síðastliðnum tjáði Gylfi Þór Þorsteinsson, teymisstjóri fjáröflunar- og kynningarsviðs Rauða krossins, Vísi að hluti fjárins sem myndi safnast myndi ekki renna beint til Grindvíkinga í neyð heldur yrði nýttur til að efla búnað Rauða krossins. Til að mynda búnað sem þurfi í fjöldahjálparmiðstöðvar, bedda, sængur og annað.
