Eldgos er hafið við Grindavík. Aukinnar skjálftavirkni varð vart um klukkan 3 í nótt og fljótlega voru gefin út fyrirmæli um að rýma skyldi Grindavík strax. Fyrstu túlkanir á fyrirliggjandi gögnum bentu til að eldgos væri yfirvofandi og að hraungos væri líklegasta sviðsmyndin.

Það gekk svo eftir því klukkan 07.59. sást í vefmyndavélum RÚV að gos var hafið.

Hjördís Guðmundsdóttir, hjá almannavörnum, segir að gosið sé norðan við Grindavík en nánari staðsetning liggi ekki fyrir.

Í tilkynningu frá Veðurstofunni segir að fyrsta mat á staðsetningunni bendi til að gosið sé nærri Sundahnúk.