David Grusch, fyrrum starfsmaður bandaríska varnarmálaráðuneytisins, segir að bandarísk yfirvöld leyni 12 metra „Tardis-líku“ geimfari sem „sé á stærð við fótboltavöll að innan“. Þetta sagði hann að sögn á leynifundi sem fór fram í þakíbúð í New York. Meðal viðstaddra voru starfsmenn leyniþjónustunnar CIA, einnig frá alríkislögreglunni FBI auk áhrifafólks frá Wall Street.

MailOnline segir að um 60 manns hafi sótt fundinn sem var haldinn að frumkvæði John D‘Agostin, ráðgjafa um viðskipti með rafmynt, og John J Altorelli, lögmanns.

Bannað var að taka myndir á fundinum en ónafngreindir heimildarmenn hafa lekið myndum af Grusch að tala og skýrt frá sumu því sem hann sagði, þar á meðal um „Tardis“ sem hann sagði að geti stýrt bæði tíma og rúmi og geti framleitt næga orku fyrir 70.000 heimili.

Eftir því sem heimildarmennirnir segja þá voru flestir fundargesta fólk sem trúir á að líf þrífist á öðrum plánetum og að geimverur hafi heimsótt jörðina.

Grusch komst í heimsfréttirnar síðasta sumar þegar hann sagði að bandarísk stjórnvöld séu með „heil og skemmd geimför frá öðrum plánetum“ í sinni vörslu. Þessi ummæli urðu til þess að efnt var til fyrstu yfirheyrslanna hjá þingnefnd um mál tengd óþekktum fljúgandi hlutum.

Grusch bar vitni fyrir nefndinni og sagði að fólki hafi „verið unnið mein og slasað“ þegar reynt var að leyna þessum upplýsingum.

Grusch kom fram í the Joe Rogan Experience hlaðvarpinu í nóvember. Þar sagði hann að bandarísk stjórnvöld hafi fundið að minnsta kosti tíu lík geimvera í flökum geimfara sem hafa hrapað til jarðar.