Karlmaður hefur játað að hafa kveikt í skemmtistaðnum Útgerðinni á Akranesi skömmu fyrir áramót. Var hann einn að verki og telst málið upplýst samkvæmt tilkynningu á vef lögreglunnar.

„Við yfirheyrslu hefur einn aðili játað verknaðinn og verið einn að verki. Málið telst upplýst,“ segir á vef lögreglunnar.

Forsvarsmenn Útgerðarinnar þakka fyrir hringingar, skilaboð, heimsóknir og boð um aðstoð til að koma öllu í samt lag. Biðja þeir fólk um að fordæma frekar verknaðinn en aðilann sem stóð fyrir íkveikjunni.

„Öll höfum við gert eitthvað sem við sjáum eftir, mismikið þó og öll eigum við aðstandendur sem standa okkur að baki. Við heyrum reiði í mörgum, sér í lagi að kippa staðnum af okkur á þessum tíma. En áramótin fóru fram, allir skemmtu sér og nú er komið nýtt ár, ný tækifæri og megi þetta ár einkennast af hamingju og gleði fyrir okkur öll.Þar sem við erum náið samfélag, fer allt mjög fljótt um bæinn okkar. Endilega hafið það í huga að viðkomandi á aðstandendur, og þau eru eins og hann, hluti af okkur,“ segir í færslu Útgerðarinnar á Facebook. „Við setjum í fimmta gír og reynum að opna eins fljótt og hægt er……enda söknum við ykkar helling.“