Steypustöðin birti í dag yfirlýsingu vegna banaslyssins á Grindavíkurvegi. Tveir létust í slysinu sem var á tólfta tímanum í gærdag.

Segir þar að í gær hafi orðið sá hörmulegi atburður á Grindavíkurvegi að tveir bílar hafi rekist saman í hálku. Annað ökutækið var á vegum Steypustöðvarinnar.

„Eins og komið hefur fram voru ökumaður og farþegi hins ökutækisins úrskurðuð látin á vettvangi, en ökumaður Steypustöðvarinnar fluttur til aðhlynningar á Heilbrigðisstofnun Suðurnesja,“ segir í yfirlýsingunni.

Enn fremur:

„Gærdagurinn var mikill sorgardagur í sögu Steypustöðvarinnar og er starfsfólk okkar harmi slegið vegna atburðarins. Hugur okkar er hjá aðstandendum hinna látnu, þar sem margir eiga nú um sárt að binda. Sem stendur leggjum við áherslu á að hlúa að starfsfólki okkar, þar sem öllum er mjög brugðið.“

Segir að aðhlynning fyrirtækisins eigi ekki síst við um ökumanninn sem sem var við störf á vegum félagsins. Unnið er með þeim aðilum sem koma að rannsókn slyssins og allar upplýsingar sem mögulega er hægt að veita verða veittar.

Yfirlýsingin í heild:

Í gær, föstudaginn 5. janúar, varð sá hörmulegi atburður á Grindavíkurvegi að tveir bílar rákust saman í hálku og var annað ökutækið á vegum Steypustöðvarinnar. Eins og komið hefur fram voru ökumaður og farþegi hins ökutækisins úrskurðuð látin á vettvangi, en ökumaður Steypustöðvarinnar fluttur til aðhlynningar á Heilbrigðisstofnun Suðurnesja.

Gærdagurinn var mikill sorgardagur í sögu Steypustöðvarinnar og er starfsfólk okkar harmi slegið vegna atburðarins. Hugur okkar er hjá aðstandendum hinna látnu, þar sem margir eiga nú um sárt að binda. Sem stendur leggjum við áherslu á að hlúa að starfsfólki okkar, þar sem öllum er mjög brugðið. Aðhlynning okkar á ekki síst við um ökumanninn sem var við störf á vegum félagsins. Við vinnum einnig með þeim aðilum sem koma að rannsókn slyssins til að veita allar tiltækar upplýsingar sem við mögulega getum.

F.h. Steypustöðvarinnar ehf.,

Björn Ingi Victorsson, forstjóri.