Fyrir skömmu síðan var læknirinn Árni Tómas Ragnarsson sviptur lækningaleyfi að hluta, þannig að hann hefur ekki lengur heimild til að ávísa lyfjum. Ástæðan er sú framganga Árna að ávísa ópíóðalyfjum til fíknisjúklinga, í skaðaminnkunarskyni. Árni hefur tjáð sig frjálslega um þetta í aðsendum greinum í Morgunblaðinu.

Sú ákvörðun Landlæknis að svipta Árna heimild til lyfjaávísana hefur vakið gagnrýni og sumir halda því fram að þetta auki mjög á vanda sjúklinga hans og komi í veg fyrir að þeir geti lifað eðlilegu lífi.

Móðir fíkils, Dagbjört Ósk Steindórsdóttir, tjáir sig um þetta í grein á Vísir.is í dag:

„Að komast í lyfjaskömmtun hjá Árna Tómasi lækni hefði breytt lífi sonar míns mikið. Hann gæti þá tekið inn hreint efni og þarf þá ekki að kaupa lífshættuleg efni á svarta markaðnum sem gætu kostað hann lífið. Hann bíður eftir afeitrun og meðferð og sú bið er svo löng að réttnefni biðarinnar, er biðin á dauðalistanum,“ segir Dagbjört, en sonur hennar er 32 ára.

Hún segir ennfremur:

„Heilbrigðisyfirvöld verða að fara að horfast í augu við að ,,ópíóðafaraldurinn’’ eins og þeir kalla er ekki faraldur sem gengur yfir. Ópíóðanotkun fíknisjúklinga er komin til að vera og eykst ef ekkert er að gert. Farið að taka ákvörðun hvort þið ætlið að umgangast fíknisjúklinga sem sjúklinga eða úrhrök sem mega deyja drottni sínum! Fólk er að deyja í stríðum straum og þið gerið ekkert!“

Dagbjört segir að Árni hafi uppfyllt læknaeiðinn með því að lina þjáningar fíknisjúklinga með því að skrifa upp á fyrir þá ópíóðalyf. Hann hafi mætt sjúklingum sínum á þeim stað sem þeir voru á. Hún átelur heilbrigðisyfirvöld fyrir að taka ekki ábyrgð á þeim sjúklingum sem Árni annaðist og segir að þeir muni fremja glæpi og lenda í fangelsum, verða heimilislausir og jafnvel deyja.

Dagbjört fer yfir lög um réttindi sjúklinga og bendir á að fíknisjúklingar njóti ekki fullkominnar heilbrigðisþjónustu. Greinina má lesa hér.