Í umfjöllun Guardian kemur fram að þó að einstaklingar séu nafngreindir í umræddum skjölum þýði ekki að þeir hafi haft rangt við eða séu grunaðir um refsiverða háttsemi.
Meðal einstaklinga sem nefndir eru í skjölunum eru Andrés prins og Bill Clinton fyrrverandi Bandaríkjaforseti. Skjölin sem um ræðir eru hluti af dómskjölum í máli gegn Ghislaine Maxwell en hún var dæmd í tuttugu ára fangelsi í lok árs 2021, meðal annars fyrir að tæla ólögráða stúlkur í kynlífsmansal og flytja þær á milli landa.
Skjölin sem nú eru birt varða meðal annars vitnisburð Johönnu Sjoberg sem var tvítug að aldri þegar hún var ráðin nuddari Jeffrey Epstein. Hún hafði enga reynslu af því að starfa sem nuddari og segir að hún hafi verið þvinguð til kynferðislegra athafna með Epstein.
Í skjölunum kemur fram að Epstein hafi sagt henni árið 2016 að „Clinton vildi þær ungar“ og er það vísun í ungar stúlkur.
Bandaríkjaforsetinn fyrrverandi hefur sagt að hann hafi ekki vitað um skelfileg afbrot Jeffrey Epstein og samskipti þeirra hafi verið lítil sem engin á þessari öld. Hann viðurkenndi þó að hafa ferðast í einkaþotu auðmannsins á sínum tíma. Í umfjöllun Daily Mail kemur fram að nafn Clintons birtist 50 sinnum í þeim skjölum sem hafa verið birt.
Andrés prins er einnig nefndur í skjölunum og í þeim er meðal annars vísað í heimsókn hans á einkaeyju auðmannsins þar sem Epstein hefur verið sakaður um að misnota fjölda stúlkna.
Í vitnisburði Ghislaine Maxwell er hún spurð að því hvort hún hafi verið viðstödd þegar Andrés heimsótti Epstein á eyjuna. Hún kvaðst aðeins muna eftir einni heimsókn prinsins og engar stúlkur eða konur hafi verið á eyjunni, að undanskildu starfsfólki Epsteins.
Sjoberg segir í vitnisburði sínum að nokkrir frægir einstaklingar hafi heimsótt Epstein, þar á meðal Michael Jackson og töframaðurinn David Copperfield.
