Þremur dögum eftir að hinni leynilegu Shenlong geimflugvél Kínverja var skotið á loft í desember kom hún 6 óþekktum hlutum á braut um jörðina. Virðist sem sumir þeirra sendi frá sér merki.

Live Science segir að áhugamenn um geimferðir hafi fylgst með ferðum Shenlong og hlutanna, sem var komið á braut um jörðina,  og hafi numið sendingar frá sumum þeirra.

Hlutirnir hafa fengið heitin A, B, C, D, E og F. Scott Tilley, áhugamaður um geimferðir, sagði í samtali við Live Science að svo virðist sem hlutur A sendi frá sér merki sem minna á merki sem Shenlong hefur sent frá sér í fyrri ferðum sínum út í geim.

Þetta var þriðja ferð Shenglon út í geiminn en áður fór vélin þangað í september 2020 og ágúst 2022. Í þessum ferðum voru litli hlutir settir á braut um jörðina en ekki er vitað hvaða tilgangi þeir þjóna.

Í grein í SpaceNews í nóvember 2022 kom fram að þessir hlutir væru hugsanlega litlir gervihnettir eða hluti af einhverri tilraun.