Athos þessi er sagður hafa spáð rétt fyrir um ýmis atriði í gegnum tíðinda, til dæmis kórónuveirufaraldurinn, innrásina í Úkraínu og dauða Elísabetar Bretlandsdrottningar svo fátt eitt sé nefnt.
Breska blaðið The Sun ræddi við hann um árið 2024 og er óhætt að segja að hann sjái ýmislegt merkilegt – en á sama tíma óhugnanlegt – gerast.
Í fyrsta lagi spáir hann því að mikil tímamót verði í geimsögunni þegar jarðarbúar komast í fyrsta sinn í samband við geimverur.
Hann á þó ekki von á því að þetta verði eins og í æsilegum vísindaskáldsögum eða bíómyndum þar sem heilu geimskipin koma til jarðar heldur munum við komast í samband í gegnum háþróuð og dulkóðuð merki.
Þá segir Athos að einhvers konar loftsteinn, með allskonar framandi og sjaldgæfum efnum, lendi á jörðinni á þessu ári. Í kjölfarið fari af stað nýtt geimkapphlaup þar sem Kína, Rússland og Vesturlöndin verða fremst í flokki í þeirri von að komast yfir meira af þessum efnum.
Athos segir að árið 2024 muni líka marka tímamót þegar kemur að gervigreindinni sem verður sífellt þróaðri.
Hann á von á því að á þessu ári muni tæknin verða orðin það fullkomin að tæki, vélmenni eða tölvur til dæmis, muni öðlast sjálfstæða hugsun og geta starfað án afskipta mannfólks. Segir hann að tækin muni á endanum þróa sitt eigið tungumál sem mannfólk mun ekki geta skilið. Vélmennin muni svo að lokum, vonandi ekki fyrr en í fjarlægri framtíð, gera einhvers konar uppreisn gegn mannfólkinu.
Athos segir að þriðja heimsstyrjöldin sé handan við hornið en hvorki Rússland né Ísrael muni eiga beinan hlut að máli, þvert á spár sumra. Hann segir að einhvers konar atburður í Suður-Kínahafi eða stórfelld netárás verði til þess að þriðja heimsstyrjöldin brýst út. Þetta stríð muni leiða til mikilla efnahagslegra hamfara fyrir jarðarbúa.
Athos segir svo að lokum að náttúruhamfarir muni setja strik í reikninginn víða. Hann sér fyrir sér „sársauka“ í Mið-Austurlöndum og í Afríku, einna helst Suður-Súdan, Sómalíu og Jemen. Þá segir hann að í Bandaríkjunum muni fellibyljir og flóð hafa áhrif á líf margra við Mexíkóflóa. Í Kaliforníu, Oregon og Washington-ríki muni skógareldar valda gríðarlegu tjóni.
