Áramótaþáttur Íþróttavikunnar var af dýrari gerðinni þetta árið, Kristján Óli Sigurðsson og Hörður Snævar Jónsson mættu sem gestir í þáttinn sem Helgi Fannar Sigurðsson og Hrafnkell Freyr Ágústsson hafa stýrt í vetur.

Í þættinum voru veitt hin ýmsu verðlaun og þá var farið yfir allt það helsta úr íþróttalífinu hér á landi sem og erlendis.

Rætt var um íslenska karlalandsliðið sem er á leið í umspil fyrir EM í mars, Hrafnkell Freyr er ekki vongóður. „Nei ég hef voðalega litla trú á því, nema við náum að líma saman tvo draumaleiki,“ segir Hrafnkell.

Hörður Snævar segir stöðu lykilmanna ekki góða eins og staðan er í dag. „Ef við horfum á stöðuna eins og hún er í dag, Aron Einar var í aðgerð og ekki spilað síðan í apríl. Gylfi Þór verið meiddur, Jóhann Berg verið meiddur undanfarnar vikur. Hákon Arnar mikið á bekknum, hvað verður með Albert Guðmundsson, Orri Steinn ekki mikið að spila hjá FCK, Alfreð byrjar einhverja leiki hjá Eupen en ekki alla. Það þarf allt að detta.“

Kristján hefur hins vegar mikla trú. „Ég hef bullandi trú, þetta snýst um að það sjóða saman þann leik og klára hann. Eiga svo draumadag gegn Úkraínu eða Bosníu. Gylfi, Aron og Jói að spila sinn síðasta dans, þeir elska að spila fyrir landsliðið.“

Hrafnkell segir að eldri menn þurfi að berja trú í þá ungu. „Jói, Alfreð og þeir verða að koma því í hausinn á þessum ungu hvað þetta skiptir miklu máli.“

Umræðan í heild er í spilaranum.