Mikil umræða er á meðal Grindvíkinga um eftirlit í bænum. Greint hefur verið frá þjófnaði og augljósum tilraunum til innbrota. Lögreglustjóri segir eftirlitið í bænum mjög gott og fylgst sé með því hverjir fara inn í bæinn.
Ekki er gist í mörgum húsum í Grindavík þessa dagana þrátt fyrir að það sé heimilt. Lögregla hefur eftirlit með bænum en mikil umræða er á meðal bæjarbúa um að þessu eftirliti sé ábótavant, hver sem er geti valsað inn í bæinn og stolið eignum.
Einn íbúi greindi frá því á samfélagsmiðlum að gaskútum og grillábreiðu hefði verið stolið. Einnig að þjófarnir hafi gengið upp að hurðinni hjá sér og athugað hvort þeir kæmust inn í húsið.
Annar greindi frá því að hjólinu sínu hefði verið stolið. Sá þriðji sagðist hafa séð fótspor í snjónum við húsið sitt. Augljóst væri að einhver hefði gengið upp að hurðinni til að athuga hvort hann kæmist inn.
Sá fjórði greindi frá því að reynt hafi verið að stela hjólhýsi.
Íbúar ræða sín á milli um að koma upp eftirlitsmyndavélum og hvaða kerfi séu best til þess fallin. Það sé nauðsynlegt að hafa augu með eignum sínum.
Einnig er óánægja með eftirlitið í bænum, meðal annars á lokunarpóstunum þremur. Einn íbúi greindi meðal annars frá því að lokunarpóstur hafi verið mannlaus og hann keyrði því í gegn án þess að þurfa að gera grein fyrir sér.
Annar greindi frá því að á jóladag hafi öllum verið hleypt inn í bæinn, til þess að heimsækja kirkjugarðinn.
Ræða íbúar um að koma þurfi upp betra kerfi, svo sem að skrá niður alla sem koma eða veita sérstök leyfisbréf, eins og hafi verið gert eftir Vestmannaeyjagosið árið 1973.
Úlfar Lúðvíksson, lögreglustjóri á Suðurnesjum, segir að eftirlit með bænum sé mjög gott. Örfá tilfelli þjófnaðar hafi komið upp.
„Það er stöðug lögregluvakt í bænum, allan sólarhringinn,“ segir hann.
Þá segir hann eftirlit á lokunarpóstunum einnig gott.
„Það er fylgst með því á lokunarpóstum hverjir eru að fara inn,“ segir hann. „Einungis þeir sem eiga þangað erindi mega fara til Grindavíkur. Íbúar bæjarins og þeir sem eiga hagsmuna að gæta, svo sem starfsmenn fyrirtækja og fyrirtækjaeigendur.“
