Gröf þýska kanslarans Helmut Schmidt og konu hans Loki var svívirt um helgina. Málaðir voru hakakrossar á legsteininn með appelsínugulri málningu.
Helmut Schmidt var kanslari Vestur Þýskalands á árunum 1974 til 1982. Áður var hann varnarmálaráðherra og fjármálaráðherra. Schmidt sat fyrir flokk Sósíaldemókrata. Hann var einna þekktastur fyrir að beita sér fyrir Evrópu- og alþjóðasamstarfi og fyrir að taka hart á Baader Meinhof hryðjuverkahópnum.
Hann var virkur í þýsku þjóðlífi eftir að hann hætti í stjórnmálum. Bæði var hann ritstjóri vikublaðsins Die Zeit og reglulegur gestur í ýmsum spjallþáttum. Þótti hann oft frekar hranalegur og var frægur fyrir að reykja sígarettur jafn vel þar sem hann mátti það ekki. Þrátt fyrir þetta varð hann sífellt vinsælli með árunum.
Schmidt lést árið 2015 á heimili sínu í Hamborg, þá 96 ára gamall. Hann var grafinn þar í borg, við hlið konu sinnar Loki Schmidt sem lést fimm árum áður.
Að sögn lögreglunnar í Hamborg var um að ræða „heilalaus skemmdarverk“ og hefur legsteinninn verið hreinsaður af ófögnuðinum.
„Þetta heilalausa skemmdarverk er alvarleg tilraun til þess að reyna að eyðileggja minninguna um Helmut og Loki. Þau voru ávallt trú frelsinu, lýðræðinu og skilningi á milli þjóðum heimsins,“ segir í tilkynningu lögreglunnar.
Schmidt var í Hitlersæskunni og barðist í seinni heimsstyrjöldinni, fyrst á austurvígstöðvunum í innrásinni í Sovétríkin og síðar á vesturvígstöðvunum þegar bandamenn sóttu inn í Frakkland og Benelúx löndin. Undir lok stríðsins var hann handsamaður af Bretum og dvaldi í hálft ár í fangabúðum.
Schmidt gekkst við því að hafa fallið fyrir hugmyndafræði nasismans á sínum tíma, þrátt fyrir að vera af gyðingaættum sjálfur að hluta. Hann viðurkenndi brot sín og Þjóðverja.
„Við berum ábyrgð, og aðeins við, á dauða meira en sex milljónum gyðinga,“ sagði hann við franska tímaritið LePoint árið 2013.
Nancy Faeser, innanríkisráðherra Þýskalands, hefur einnig fordæmt skemmdarverkin á gröf Schmidt. „Helmut og Loki Schmidt stóðu ávallt gegn fyrirlitningu mannkyns, kynþáttahatri og gyðingahatri,“ sagði Faeser.
