Þórdís Kolbrún Reykfjörð Gylfadóttir, varaformaður Sjálfstæðisflokksins, játar því aðspurð að hana langi að verða næsti formaður flokksins og leiða flokkinn og þjóðina inn í framtíðina. Hún segir mikilvægt að hér á landi sé öflugt stjórnmálaafl og breiðfylking borgaralega sinnaðs fólks sem veit hvaða erindi það hefur í íslensku samfélagi og hvað þarf til að leiða okkur inn í framtíðina. Þórdís Kolbrún er gestur Ólafs Arnarsonar í hlaðvarpi Eyjunnar nú um jólin.
Eyjan - Þórdís Kolbrún Reykfjörð Gylfadóttir - 4.mp4
Nú er talað um að það kunni að styttast í að þú bætir við þig ábyrgðarstörfum …
„Bæti við mig börnum, nei djók,“ segir Þórdís Kolbrún og springur upp úr.
Þú ert varaformaður Sjálfstæðisflokksins og það hefur lengi verið orðrómur, já við skulum kalla það orðróm, um að formaðurinn sé farinn að hugsa sér til hreyfings. Margir spáðu því reyndar að hann ætlaði sér sendiráðið í Washington en samkvæmt nýjustu fréttum þá er ekki svo. En, þú hefur hug á að taka við af honum þegar hann hættir, er það ekki?
„Ég hef sagt, ég er tilbúin, það væri heiður að fá að leiða Sjálfstæðisflokkinn. ég auðvitað verið varaformaður í bráðum sex ár og ég mun þegar sá tími kemur leggja það á borðið hvaða erindi ég tel mig hafa fyrir flokkinn, fyrir Ísland, til að leiða okkur inn í framtíðina, til þess að takast á við breytta veröld. Ég held að það sé að verða varanleg breyting og við erum ekki ónæm fyrir því sem er að gerast í kringum okkur með mjög mikla og vaxandi spennu,“ segir Þórdís Kolbrún.
Þú hefur nú fylgst vel með því, verið í hringiðunni.
„Já, og það hafa verið tvö lærdómsríkustu ár sem ég hef lifað og mun búa að alltaf. ég get alveg sagt að mig langar það. Það er auðvitað í höndum flokksfólks hvort það treystir mér til verksins, en ég tel mjög mikilvægt að við séum hér með öflugt stjórnmálaafl og breiðfylkingu af borgaralega sinnuðu fólki sem veit hvaða erindi það hefur í íslensku samfélagi, hvað þarf til til að leiða okkur inn í framtíðina, hvað þarf til að bæði eiga við áskoranir utan úr heimi en líka hérna heima,“ segir Þórdís Kolbrún.
„Þá skiptir máli bæði að vera með leiðir, svona nálgun og lausnir sem virka, en líka að tapa ekki gleðinni og muna það í hvers konar stöðu við erum hérna. Þrátt fyrir allt er þetta svo mikið í okkar höndum. Við höfum öll færi til að halda áfram að byggja upp mjög öflugt og gott samfélag og það snýst ekki bara um að auka verðmætasköpun til að auka verðmætasköpun heldur snýst það um að við getum verið mannvænt samfélag, að það sé gott að búa hérna, að það sé gaman að búa hérna, að fólk langi að flytja hingað, langi að vera hérna og að við getum áfram skorað efst á lista yfir samfélög sem önnur samfélög líta til. Það er alltaf verk að vinna,“ segir Þórdís Kolbrún, „en ef ég fengi tækifæri til þess að leiða Sjálfstæðisflokkinn inn í framtíðina og vonandi hafa áhrif á íslenskt samfélag til framtíðar þá langar mig mjög að gera það.“
