Þórdís Kolbrún Reykfjörð Gylfadóttir, fjármála- og efnahagsráðherra, segir að mikill munur sé á því að vera fyrst og fremst náttúruverndarsinni og að setja loftslagsmál í forgrunn. Nauðsynlegt sé að raska náttúru til að vinna þá grænu orku sem koma á í stað jarðefnaeldsneytis. Hún segir sum mál flóknari en önnur þegar kemur að ríkisstjórnarsamstarfinu og telur eðlilegt að samskiptamynstrið innan stjórnarinnar breytist á sex árum. Þórdís Kolbrún er gestur Ólafs Arnarsonar í hlaðvarpi Eyjunnar í aðdraganda jóla.

Eyjan - Þórdís Kolbrún Reykfjörð Gylfadóttir - 1.mp4

Það hefur ekki farið fram hjá neinum sem fylgist með að það hafa verið ansi sterkar átakalínur innan ríkisstjórnarinnar í ýmsum málum og það virðist vera þannig að ríkisstjórnarflokkarnir eigi erfitt með að koma sér saman um mál sem á að senda inn í þingið. Hvernig er þetta ríkisstjórnarsamstarf? Eins og maður horfir á þetta þá virðist þetta hafa verið mjög góður andi í þessari ríkisstjórn á fyrra kjörtímabili, en síður svo á þessu kjörtímabili.

„Ég veit það ekki,“ segir Þórdís Kolbrún. „Auðvitað þróast samstarf og samskipti fólks þegar þú berð saman á ári eitt og ári sex. Það held ég að sé bara eðlilegt. Mér finnst fólk geta talað saman við ríkisstjórnarborðið. Við getum fundið lendingu og leiðir til þess að ýta málum áfram og taka ákvarðanir. Það eru alveg málefni sem eru töluvert flóknari en önnur …“

Það hefur verið gagnrýnt til dæmis að Vinstri grænir standi í vegi fyrir því að við getum hrint í framkvæmd góðri áætlun í loftslagsmálum.

„Ég er þeirrar skoðunar að við séum búin að smíða of flókið regluverk og umhverfi fyrir þessa ákvarðanatöku,“ segir Þórdís Kolbrún. „Og það er ekki eitthvað sem gerðist á þessu kjörtímabili eða því síðasta. Það er lengra síðan og við höfum reynt að vinna innan þess kerfis og látið það einhvern veginn viðgangast. Það er munur á því að vera fyrst og fremst náttúruverndarsinni eða fyrst og fremst með áherslu á loftslagsmál og það skiptir máli að gera þann greinarmun. Ef þú ætlar fyrst og fremst að taka stöðu með náttúruvernd og vilja ekki raska þá þýðir það að það hefur þau áhrif að öll önnur orkuvinnsla, allt sem á að koma í staðinn fyrir jarðefnaeldsneyti, og er þá grænt eða sjálfbært, það notarðu náttúruna til þess að framleiða. Við vitum að orkuöflun, framleiðsla á raforku, hvernig við nýtum raforku, það helst mjög í hendur við okkar lífskjarasókn, verðmætasköpun og uppbyggingu í atvinnulífi.“

Þetta og margt fleira. Þórdís Kolbrún ræðir meðal annars gjaldeyrismál, sem hún telur ekki vera í forgangi nú. Þá talar hún um formennskuna í Sjálfstæðisflokknum, nýlegar skipanir í sendiherrastöður, griðastaðinn sem hún á í faðmi fjölskyldunnar og jólin.

Hlaðvarpið í heild verður aðgengilegt hér á Eyjunni á morgun, Þorláksmessu, kl. 6 f.h.